Ram ka thlir a-VI

Ram ka thlir a-VI

KAN RAM HIAN TIHTUR HMABAK KAN VA NGAH EM!

(Ka vei zawng thilte hi ataka hlenchhuah hun hi ala awm ka ring, chutih hunah chuan ka vei hlawhtling ta ka la ti ve ngei in nia ka rin ni...)

   Kan ram hi Area Sq. 1870.75 niin, LAD Record-2022 ah khan mihring Nuai khat, Singkhat, Sangkhat, zahnih leh sawmsarih pasarih (1,11,277) kan awm a ni a. Kan la tam lo hle. Hetah hian Mipa aiin hmeichhia an la tam zawk bawk a. Hmeichhia hi 55827 awmin, Mipa hi 55450 kan awm mek a ni. 

     Mizorama Autonomous District Council (ADC) pathum awmah hian keini hi ADC dangte MADC leh CADC tena min enber kan ni mek a. Chutih rualin, MADC ngat te phei chu kan aimahin an advance a, tunah hian an ni chuan CEM Bangla te an nei tawh a, felfai takin engkim an kalpui chho mek a ni. Chumai bakah tunah hian an Secretariat (MADC Main Building) sakna tur pawh sum an hmu tawh niin Social Media kaltlangin hriat a ni bawk a. ADC thangduang tak an ni chho mek tihna a nih ber mai chu… 

     Khalam kha chu duh tawk ila, ni danga sawiah la khek ila. Ka vei em em ka lo au ve fo tawh, ataka tihpuitlin hlan ka nghahhlelh em em te tun tum chu han sawi ve dawn ang hmiang; he thuziak hian kan ram hruaitute leh kan officer-te beng thleng ngei se, tih hi ka sawi hmasa duh nghal nise.

DOKULHA HALL:

   Lawngtlai Bazar Area chhung a mi, Mizoram Vety Deptt., chhaka Building lianpui mai awm,  kan khawpui tihmingthangtute zinga pakhat la ni reng Dokulha Hall hi siam\hat dan a awm em? Engtia hmalak chi nge ni anga, engtia han kalpui zel tur nge  ni ang. Tuna a din dan ang anga |umpi eichhiat mai atan chuan ka phal mai bik hi a rinawm si lo, ngaihtuahna thar kan sena kan vei tlan a hun hle a ni.

    Lawngtlai khawpuia tunhmaa Concert a awm leh intihhlimna a awm kan hriata pawimawh em em chu DOKULHA HALL hi a ni a (ka sawisual lo turah ka ngai…). Tunah chuan hmuhtlakloin a awngrawp zo a, a chhungah Boxing Ring a awm a, a chhehvel erawh Damdawi ti leh kawhmawh bawlte tawmrukna a ni titih ta. Humhalh a ngai a, siamthat a ngai tak zet a ni.

      A bul atanga siam\hain DPR te buatsaiha kan hmuhtheih Millenium Centre Aizawl aia changtlung leh mawiin emaw Kolkatta-a Axis Mall ang te-a chang tlung leh mawihnai taka siam hi a theih ngei hian alangin ka hria a, hei hi thil harsa lutuk niin alanglo kan LADC pawh kum 50 kan lo tling tawh, hmasawnna leirem kan rah a hun hlein ka hria a, a hall nihna hming putu Pu Dokulha hming bo si lovin, ‘Dokulha Hall’ tih tawp aiah ‘Dokulha Shopping Mall’ angte-a din/siam ni se, a va \ha dawn em. (Rawtna ni chiahlo mahse duh thawh luatah ka rawn sawi ni se..) Chhawng 7/8 velin sa ila, a hnuai ber erawh Motor Parking nise, a chhungah pindan hrang hrang siam ila, a laiah lift/elevator dahin ruahmanna siam nise - kan LADC tan pawh Revenue Source tha lutuk tur a lo ni zel a, kan va chhawr dawn tak em. Tihtheih dan awm se, chu hun chu ka va nghakhlel em...

BAZAR CHAWHMEH ZAWRHNA:

    Bazar chawhmeh zawrhna (Council Veng pan pheina dinglam sir a mi khu...)  a thlang a \ang khuan rawn sa ila, chhawng emaw zat a ni thei ang a, a hnuai ber Satalhna ni se,  a chung chiahah chawhmeh zawrhna, a chung lehah Second hand dawr ni thluah mai se, kawngpui an Motor garage ni tel ta bawk se, a chung leh ah Accessories etc., leh thil chi hrang hrang zawrhna ni se, kan Lawngtlai hmel hi ava danglam dawn em!

     Chutah chuan kan Lai hming ngei chawiin dawr lian tak tak, changkang leh tunlai kan kawl ve thei tawh anga kan va chhawr tangkai dawn tak em. Kan Lai khawpui, kan Jerusalem anihna hi a va chawinung dawn tak em, tih te hi rilru, suangtuahna kilkhatah a awm reng a. Ka vei a ni. Kan Council tan revenue tha tak a ni dawn bawk si a. A tangkaipui ber ber tur te kan ni si; a ram neitu hi hre chiahlo mah ilangin a ram neitu, leilung fate kan nihna zawnah a in hawn hle pawh beisei ila; thil\ha tur kan ram tan anihna zawnah….

BAZAR SHED:

      Kan sawi zel teh ang, vei a huna ka vei a, a taka hmuh ka chak a, ka-a sawi theihna hmunah \hahnemngaih thilah ka sawi ve tawh tak na a, \awngka maia sawi ka nih avangin hriatreng a har a, a aia ringin thuziak hmanga puanchhuah a\ulah min ngaihsak mai teh u. Kan Central YLA Playground thlenhma Bazar shed (sa talhna hmun khu, tunah hian sa an la talh em tih ka chiang chiah ta lo...) khulai khu ka vei a, tuman Satalh leh chawhmeh inzuar/pho hmuh tur abar an awm ta lo a, tikhian kan roh san titih a ni mai lo'ng maw... 

      Sum tam tak sengin sawrkarin a din a, a siam a, a sa anih si chuan, a takin kan hmang leh bawk si lo. Ka ui hle mai! Hei hi thuneituten kan Lairam mamawh ‘Skill Training Centre/Skill Training Development Centre -ah hmang hlauh ila, tahkhuan thiamna bik nei kan thalaite’n kan talent hmanga eizawnna centre-ah i chhuah hlauh teh ang u hmiang i. Kan \halaitena an mawh an lo thlir reng thin pakhat pawh niin ka hria a, hei pawh hi kan vei tlan hlawm a ngai a ni. Kan \halaite talent tihpuna hmasawn tir hi kan tum kha a ni bawk khan ka hre dah roh a, a inhmeh dawn hle. Helamah hian ngaihtuahna i seng bawk ang u hmiang...

AREOPAGI:

        Areopagi hi sawi leh sawi hnu ka’n sawi leh teh ang. Kan Lawngtlai khawpui laili Bazar lai takah a ding zuah mai a, motor lianin a hel dawnin angle afuhlo vang nge ni a, a buaithlak \hin hle a, a veiawm hle! An sak \hat dawn laia estimate kha hre veklo mah ilangin, plan dan ang takin sak a ni em? Nge, tuna an sak dan hi plan lawk sa, chu pawh chu ka hre thui lo hle. 

       Amaherawhchu, Areopagi hi kan duata kan humhalh \hata tun aia mawimam leh awmze neia siam erawh a hun hle mai. Kan kuhva eina chinai a banah kan tat var rang thliah thluaha tuman tifaitange ti kan awmlo a. He lai hmun hi - Kohhran, NGO’s leh Political party tena function an neihna ber a ni a, a zahawma a building hi kan thuam mawi a ngai hle a ni. Tin, hmanni khan Hnam dang lokal mipakhat hian, “Areopagi in ti a, khawi laiah khian nge Areopagi tih chu a awm, engmah (sign) awm si lo” a ti a. A dik hle mai. Ka lo veina a rei tawh a, hei pawh hi Hawrrawp mawi taka AREOPAGI tih hi kan ziah/nemkai hmat a \ha hle ang. I ram, i khawpui, i Jerusalem, kan vohbik, kan Lairam khawpui ni bawk hi -kan Lairam khawpui hmel lanna darthlang a ni pakhat bawk a sin.

-LH Hauheng, Nghilhloh Run