CEM LADC IN HOUSE FIAHNA PALTLANG

South Lungpher Bialtu MDC & CEM nibawk Pu C. Lalmuanthanga'n a sawrkar fiahna paltlang

*"Kan sawrkar ah hian, Lal bik, thunei bik leh mimal thu angin engmah a kal dawn lo..."*

-Pu C. Lalmuanthanga

CEM LADC

Biangreithlep, May 17, 2024: LADC sorkar thara CEM rintawkna fiahna Vote of Confidence chu vawiin Zirtawpni, May 17, 2024 chawhma dar 10:30AM hian LADC Session Hall ah Chairman Pu VL Hmuaka kaihhruainain tluang taka neih a ni.

Chairman Pu VL Hmuaka chuan Governor ina Vote of Confidence neih tura atih angin, lehkha a chhiar chhuak a, vote of confidence hi neih chhunzawm nghal niin elected members 18 te an kalkhawm a, CEM atana Pu C. Lalmuanthanga pawmtu elected members mi 12 awmin, a pawmlo lam elected members mi 6 an awm bawk a. Elected Members panga (5) dangten chawlh an lak avangin House an attend lo a; Pu VL Hmuaka Chairman chuan, CEM chu House ah fiahna a paltlang tih a puang nghal ani. Vote hi ban phara lak a ni. 

He hunah hian House Leader & CEM ni bawk Pu C Lalmuanthanga chuan thusawiin, House members te leh Lairam mipuite chungah lawmthu sawiin, LADC ah thla hnih chuang sawrkar kal thei lovin kan awm a, Lairam mipuiten engtikah nge sawrkar thar a pian ang tih an thlir a, a hun takah Kohhranmite tawngtaina chhana awmin MNF leh Congress ten United Legislature Party (ULP) sawrkar an din a, chutah chuan House Leader tura Pathian leh ULP te duhsakna changa CEM hial ka ni thei chu ka lawm tak zet a ni, a ti a. Politics a kan senior zawk te, viak tha leh a nachang hre zawk te an awm teuh lai a, ka chungah rinna sang tak mai an nghat hi ka lawm hle a ni, ati bawk.

Tun kan sawrkar ah hian, Lal bik leh thunei bik te, mimal thu angin engmah a kal dawn lo, tih a sawi a. Mizo Hnam pa, Pu Laldenga'n Politics ah thian hlun leh hmelma hlun an awmlo a lo tih kha a dik hle a, vawiinah hian alang chiang hle ani, ati. Opposition te pawh a tul huna min finchhuah a, kan ram leh hnam tana tha turah chuan thurawn min pe zel tur che u in ka ngen che u a, ka sawm nghal che u ani, a tibawk.

ULP a Dy Leader leh Dy. CEM ni bawk Pu Sanghuliana Mualchin pawn thusawiin, tuna kan CEM hi kum thu hlaah ala naupanga a chim chin a sang lo hle ang, Lairam a hruaina tur kawngah Tawngtaipuia finchhuah zel turin a thawhpui MDCs te chu a ngen a, Mithiam a lehkha zirlai atanga ram leh hnam veimi ani a, tha taka kan Lairam tan hna a thawh theihna atan i finchhuahpui zel ang u, a ti a. ULP sawrkar apian theihna tura hmalatu zawng zawngte leh a bik takin kan Governor leh Chief Minister chungah lawmthu ka sawi bawk a ni, ati.

Pu T. Zakunga Vawmbuk Bialtu MDC pawn, Tun term chhunga CEM kan neih thar lehna tur atana thusawina hun min pe hi ka lawm a, Thla 2 chuang Deputy Commissioner  (DC) Lawngtlai awpna hnuaiah kan awm a, Lairam mipuite thla phang takin an awm a, vawiin niah Pu C Lalmuanthanga kaihruaina hnuaiah sawrkarna kan nei ta hi Lairam mipuite pawh an lawm hle in ka hria, a ti.

Vawiin niah fiahna sawrkar tharah neih a ngai a, fiahin kan awm ta a, rorelna felfai tak kalpui ila, hnam kan nihna chawisanga hmalam hunah ke pen zel turin a chah a, a thawhpuite mithiam, mi fel tak tak a nei a, danglam ngam sawrkar, hna tha thawk turin kan beisei a ni, a ti bawk.

Paithar Bialtu MDC & EX CEM ni bawk Pu V. Zirsanga pawn, South Lungpher bialtu Pu C. Lalmuanthanga CEM ani hi ka lawmpui a, Lalpan vengin awmpui zel se, a thiamna leh remhriatnate a ram leh hnam tan kalpui zel se, tiin duhsakna a hlan thu a sawi a ni.

Pu C. Lalmuanthanga chu a awmna party Congress-a nghet taka a awmna rah, malsawmna a dawng hi alawmawm hle a. Thla 2 chhung meuh rorelna kalpui anih theihloh hnuah Kohhranmite tawngtai chhannaah ka ngai ani, a ti a. ULP anga Congress leh MNF inlungrual taka kan kal thei hi a ropui a, alawmawm hle a ni. Aizawl lama kan hruaitute - Pu Robert Romawia Royte MLA leh Pu C. Ngunlianchunga MLA te chungah hian lawmthu ka sawi tak zet a ni. Ka thawhpui MNF mi 12 te rinawm taka an awm tlat kha a ropui a, mahni party ah nghet taka awm hi rinawmna rah a ni a ti a. Opposition member 11 te pawh ro kan relna turah min thawhpui a, min finchhuah tlat zel turin ka sawm nghal che u a ni, a tibawk.

Lai Autonomous District Council ah hian kan ziah tawh thin angin, tunah hian Elected Member 25 awmin, Chandmary Bialtu MDC - Dr Lorrain Lalpekliana Chinzah chu MLA a thlan anih avangin, a bang a tunah hian Elected Member 24 an awm a ni. 

Vawiin Special Session (vote of confidence) neih hi LADC a Chairman Pu VL Hmuaka chuan tiamchin awm lovin a titawp nghal ani.

tags:lawngtlaitoday

may17,2024